Пуш уйăхĕн 26-мĕшĕнче, Пучинкери культура çуртĕнче 1-мĕш хут театр коллективĕсен хушшинче «Театр-пирĕн пурнăç» фестиваль иртрĕ.
Кăçалхи 2022 çул Раççейри халăхсен культура эткерлĕхĕн тата Чăваш Енĕн мухтавлă çыннисен çулталăкĕ пулнă май, çак фестивале Хрисанов Николай Петровича тата Шибаева Наталия Ильиничнăна халалларăмăр.
Вĕсем нумай çул хушши чунне парса спектакльсенче, концертсенче — сăвăсем, юптарусем каласа куракансене тыткăнланă, ял халăхĕн асĕнче яланлăхах юлнă.
Мероприятие Пучинке ял тăрăхĕн администраци пуçлăхĕ Н.Фёдоров тата Йĕпреç район «Культура аталанăвĕн центрĕн» директорĕ М.Филиппова пуçларĕç. Вĕсем пурне те культура ĕçченĕсен уявĕпе тата çывхарса килекен театр кунĕ ячĕпе саламласа ăшă сăмахсем каларĕç.
Театр коллективĕсен хушшинче иртекен фестивале 3 коллектив хутшăнчĕ: Шупашкар районĕнчи СССР халăх артисчĕ Борис Алексеевич ячĕллĕ «Апаш» халăх театрĕ, Пучинкери культура çурчĕ çумĕнчи «Çăлкуç» театр, Кировă культура çурчĕ çумĕнчи «Сарпике» театр.
Вĕсене хаклама сумлă тÿресем Шупашкартанах килсе çитрĕç: Никифиров Геронтий Лукиянович – Чăваш Республикин тава тивĕçлĕ вĕрентекенĕ, Чăваш Наци Конгресĕн Аслă канаш тата вĕренÿ комитечĕн пайташĕ, Анисимова Юлия Елисеевна – Чăваш Республикин тава тивĕçлĕ вĕрентекенĕ, Чăваш Наци Конгресĕн Аслă канаш тата вĕренÿ комитечĕн пайташĕ, Кириллов Геннадий Васильевич — Чăваш Республикин тава тивĕçлĕ ĕçченĕ, пукане театрĕн артисчĕ, Анна Николаевна Кутузова – Чăваш Республикин тава тивĕçлĕ халăх артитски.
Театр коллективĕсен ĕçĕсене хаклама çăмăлах пулмарĕ тÿресене. Ку питех те кăткăс япала. 1-мĕш вырăна çĕнсе илме Пучинкесене тÿр килчĕ. Вĕсен пултарулăхне, сцена çинче хăйсене тĕрĕс-тĕкел тытма пĕлнине тÿресем пысăк хак пачĕç.
Ытти коллективсене дипломсемпе асăнмалăх парнесем парса чысларĕç.
Чи лайăх арçын рольне вылякан — Леонид Петров, Пучинкери «Çăлкуç» театрĕн артисчĕ пулса тăчĕ, чи лайăх хĕрарăм рольне вылякан — Елена Смородинова, «Апаш» халăх театрĕн артистки пулса тăчĕ.
Мероприятие хатĕрлеме спонсорла пулăшу паракан Дмитрий Хрисанова тата Илья Шибаева тав хучесемпе чысларĕç.
Щакăн евĕрлĕ пысăк уяв йĕркелесе ирттерме пултарнăшăн Пучинкери культура çурчĕн пуçлăхне Ю.Арсентьева хисеп хучĕ парса чысларĕç.
Ял халăхĕ çакăн пек пысăк шайра иртекен мероприятинче пулса савăнчĕ, нумайччен алă çупрĕ, тав сăмахĕсем каларĕ.